Svaka priča o One Day Charteru počinje mnogo prije prvog broda. Počinje na jednom mjestu sa koga se vidi biser Bokokotorskog zaliva.
Na strani Veriga, tamo gdje se zaliv najviše stisne, postoji običan kameni zidić sa kojeg se pravo pruža pogled na Gospu od Škrpjela. Nema table, nema znamenitosti, samo kamen, more i ostrvo koje kao da lebdi u daljini. Tu smo se 2017. godine prvi put poljubili. Te večeri nismo znali ništa od onoga što danas znamo. Znali smo samo da je pogled najljepši na svijetu i da nam se nikud ne žuri.
Četiri godine kasnije sa onima koje volimo, pošli smo katamaranom do same Gospe od Škrpjela i tamo se vjenčali. Tada smo postali i simbolično zauvijek vezani za Boku.
Prošle su još četiri godine i opet nas je Boka čekala da proslavimo jedan od najvažnijih dana u životu: prvi rođendan naše ćerkice. Taj dan smo opet sa voljenima proslavili u kompleksu crkve Svetog Nikole u Prčnju, a do mjesta opet stigli, katamaranom. Treća velika stanica našeg života i treća sreća na istoj obali.
Ljudi nas ponekad pitaju kako to da smo od svega napravili posao da skoro svaki dan vozimo goste ovim istim zalivom. A istina je jednostavna: Boka za nas nikad nije bila mjesto. Ona je počasni član naše porodice. Bila je tu kad smo se zaljubili, kad smo se vjenčali i kad je naša porodica porasla. Sve što danas radimo samo je način da tu ljubav podijelimo dalje. A katamarani, oni su sastavni dio naše ljubavi.
Zato, kad vas jednog dana provezemo katamaranom ili nekim drugim plovilom kroz Verige i pokažemo vam jedan sasvim običan zidić, znajte da vam ne pokazujemo znamenitost. Pokazujemo vam mjesto sa kog je za nas dvoje sve počelo.
Vaši lokalci, Nevena i Marko
